但去咁遠，搬太多食物，亦係負累！
但去咁遠，食晒落肚回程輕啲，又係好事喎！
錦鯉話點好呢？當然係想食就食喇！
長咀有幾個水源，我地出發前又落過大雨，飲用水方面唔係問題。但今次燃料其實無帶太多，起先都驚煲得太多水會唔夠煮食用！後來發覺其實係無問題既，不過審慎啲都係好！
既然講開水，不如就講咗飲水系統先。
因為我個背包無水袋位，所以我帶咗 800ml + 500ml 飲用水，其實都勉強夠來回用，唔使煲水都大概夠飲。事實上，我去程時飲咗唔夠 500ml，因為當日天氣清涼，又無太陽，所以先可以飲咁少，其實入到去都要飲返多啲。第一日用咗 600ml 左右吧？
隊長帶咗個 1.5L 水袋，幾近裝滿，佢都話好夠。
志光哥只帶咗 500ml，北潭凹買多罐保鑛力。
長咀那裡有水源，我地路經一條相當強既溪，在營地面向海邊既左手邊
而紥營地點附近亦有水源：
其實唔過濾煲滾咗都飲得，但作為裝備 L 當然要玩濾水喇！
隊長用 Sawyer mini，我就用雜嘜：
如上圖，取水時要先用容器從水潭取水，再倒入水袋，用時再過濾！
我今次就玩 gravity system... 其實田夫仔都試過，不過今次唔用空樽，而係用一個 cheap cheap 飲水袋 (hydration bladder)，可以吊在天幕杆，過濾完就要掛返起個 filter...
又或者索性掛在營上：
當然咁做其實係慢到嘔泡，所以我見有人係收集那邊都用水袋，尤得佢自己過濾，用既時候就唔使等！
講完飲，當然要講埋食喇。第一晚當然要食好啲，趕完路要補返數，唔係第日邊有力出返嚟喎！第一晚餐單係：粟米肉粒飯、煎雞翼、肥牛、凡立貝、涼伴青瓜、仲有忌廉磨菇湯！
飯後仲有薑湯芝麻湯丸！大滿足！
當晚風都幾大，飲碗熱湯，真係謝飯祈禱都感動啲！唔覺意俾人影咗！
酒精爐煲靚仔 (白飯) 簡真係絕配，零痴底！
粟米六粒製作，隔住個 mon 都感覺到有幾好食吧！
煎雞翼，是晚沒帶油，用一叮既麻油包：
肥牛、凡立貝一煲熟，仲有出發前已整好既涼伴青瓜，要有疏果嘛：
嚟張大合照先：
四餸一湯，白飯任裝，仲有糖水：
飯後執野瞓覺！風大不宜久留！
因為時間關係，雖然已經寫咗好長，但要寫埋第二朝早餐：
早餐不能太複雜，有四包一叮，兩包通粉，一罐午餐肉，同埋雞蛋！飲品又各自各喇，我煲茶飲，隊長就煲 coffee...
當然，亦都係用麻油嚟煎！
早餐進行中：
其實早上我都幾早醒，因為早瞓丫嘛！脫網係會令人早瞓！醒咗我週圍行咗一陣，然後打水煮咗少少食，之後大家醒咗又要遊覽，然後先再返嚟真係煮 brunch 食...
眼利既人可能已發覺唔見咗個天幕，因為半夜俾風吹斷了天幕杆：
條碳纖其實無事，係個金屬接口齊口斷咗！好似被鋸斷咁，詳情留返裝備篇再寫！
臨出發前，煲返水打爆咗志光哥個水樽先走人，我自己仲有 700ml 就唔搞了... 燃料其實還有淨少少！下次帶返足啲，總要有後備穩陣啲！
沒有留言:
發佈留言