2018年5月23日星期三

20180522 荃錦岰→甲龍林徑→雷公田→清潭水塘→河背村

遲啲寫返... 天氣大熱頹行

2018年5月9日星期三

20180401-0402 田夫仔露營

公假想要靜,行多啲免不了!最好無水源,連景色都無呢,就會人少喇!

所以最後決定要田夫仔,呢個營地從邊度出發都要行個半鐘,而且水源唔掂,又無景!

原來,最大既缺點,有時會變成最大的優點。

我地從荃錦營地出發,順手攞埋水,一人攞 4L 水基本上都夠用!真係要行足個半鐘架,不過全程都易行既!

我起初將個水袋掛起,覺得都幾墜,好似有人拉住你咁,但行吓行吓就順,之後都行得幾快添,因為全程都係水泥路,仲有樹蔭!行淨最後半個鐘小休咗一陣,順手拆返個水袋出嚟,手提算數,轉另一組肌肉抬丫嘛... 同行友人剛好掉轉,起初手持,後尾掛背包,呵呵...


卒之到咗,呢個招牌位仲收到電話,入咗去就無咩信號喇!


今次怕天氣熱,所以帶天幕加金仔,起初諗住只係用內帳,外面掛風扇,但後來發現呢個 configuration 唔得,風扇風力唔夠大,隔咗蚊紗之後太柔弱!呢次天幕只帶一支桿,另外帶條超長繩可以用樹或者晾衫架!

所以之後嗰次露營索性用 3 人營加天幕,因為 3 人營可以 set 把風扇入帳內!

但結果當晚係凍,唔使開風扇不但只,仲要開埋外帳同睡袋添!

講吓水源,田清橋下既水唔太流動,但可以追返個上游就清好多,半個鐘可以來回,水流動亦清,唔濾都飲得:


不過既然都帶咗濾水器,當然都玩吓,但其實都不必!我帶咗個空樽嚟裝溪水,不過咁樣出水極慢,按吓就快少少,都好唔得閒咯!


帶二朝索性吊起佢,慢慢滴!


日後要認真搞搞個濾水系統,否則太慢了...

除咗我地,其實當日仲有兩個營,一個家庭 (堅! 兩個山系細路女... ),另外兩位係男仕。


當晚分享食物,我煮蜆肉意粉,仲有唔記得咩餸喇!另外有人煮北菇滑雞,又有雞翼,同埋有啲丸,食到好飽!

第二朝蒸早餐,有包、有珍珠雞,有奶茶,仲有個面後尾一路拆營收拾一路食!



第一次起咁大壇野,一個人都搞得掂 :


今次無影大合照添,有啲可惜!或者等其他人加返多啲相喇!

呢個營地除咗人少,都無咩好處,但呢個優點實在太重要!

第二朝落返深井,有巴士直返屋企...

對於有車人仕,可能馬昂仲好,草地仲靚,但缺點就係人多!呢度係難得既樂土...

2018年2月12日星期一

2018/02/11-12 再上馬昂

我同另一班朋友仔 2017/12/31-2018/01/01 上咗嚟一次,但今次實在更正:

1. 上次馬鐵站行上嚟,行咗差不多兩個鐘咯,今次隊長揸車上,行半個鐘就到!
2. 上次難民營咁,超多人,勁嘈;今次五個自己友包場,清幽寧靜
3. 上次上到去都好夜,今次起好營食完野,仲有時間行完山先日落
4. 今次有朗哥

好!就由朗哥開始呢個旅程!話說一落車,佢就一支箭咁狗衝上山,我帶住 5L 水同個大 backpack,好在得佢高抬貴手,先至勉強追得上佢既腳步!

話說朗哥因為流感爆發先停課,上山避役症是常識吧...


我地一馬當先,其實都好,因為我係未食午餐,早啲上,起晒營佢地先到... 有時間煮個常餐自私食...




食完呢個 late tea, 大家都已經起好晒營同天幕...hea 咗一陣,要趁好天行一行山,之前露營話行山,最終都無行到,今次志光哥要把握機會!




一齊出發行山喇!大金鐘...



呢條路碎石頗多,窄佢唔算窄,但都幾斜


有啲位我都用咗手,雖然係唔夠薑多過真係需要。

今次朗哥無得威威,兩位隔叔到咗先


此地風大不宜久留,唯有追住個太陽落山,免得凍親!


Life is beautiful even with all those troubles!!!


呢度其實係網吧嚟,話說營地接收不良,出呢個位上網都唔錯


落返嚟已經日落時份,返去休息吓再煮飯!




一人煮啲,我都無影晒咁多野食。今次帶咗 3L + 8L + 5L 水上山,算係剛剛好夠。紅酒、牛扒、魚腐、餃子、臘腸飯、雞翼、咸豬手...

今次用晒酒精爐,400ml 都夠晒用,我仲帶多咗後備,但完全唔需要用;天氣都幾凍,如果暖啲仲可以唔使咁多燃料。




第二朝日出前 7 度左右咋,所以都在燒烤爐中起咗個營火。



呢個火堅,個爐入面本身上手掉低個金寶湯罐,最後發現燒爛埋...

營火邊享受大自然既寧願,身心舒暢,眼瞓就去瞓喇...Good night!

...

臨天光出去解一解決時見到此美景...


起身煲湯飲,兩個酒精爐齊開,諗住蒸饅頭送熱湯,誰不知帶了蒸架,但卻沒帶饅頭... 唯有變陣食蝦子面,好在仲有塊火腿未食、同埋幾塊咸豬手


食咗一半,又出去行山:




鹿巢石林是也...鱷魚,試劍石,仲有獨木舟


回到營地,食埋啲野,氣溫升至廿多三十度... 晒住你都咪話,日夜溫差嚇死人




啲水差不多用晒...


16L 四大一細。。。。

有啲相隊長仲未 send 出嚟,後補吧... 

近年最完美露營!

2017年12月26日星期二

2017 聖誕嶂上露營


19 年之後又上嚟,今次兩家大細,陸師兄趕時間走咗先,所以臨走既大合照無佢份添。

由頭開始講,我果邊既故事...出門口,好似中午十二點幾,出門時我只有 19kg 物資,但其實都擔心自己會好辛苦,因為未試過咁重磅要行山咯。


首先太子去彩虹:


然後彩虹轉小巴入西貢,但海下 7 號小巴太多人等,所以搭的士入去嶂上郊遊徑路口:


出發前還好,但行三分鐘休息一次,見佢地咁辛苦,我就想揹多啲,結果我 19kg 上山,唔行唔知身體好...


陸師兄一早到咗,當時係包場,我起多兩個營,開埋塊小天幕,隊長都到埋了... 最後係志光哥,一條友行上嚟堅...


遠處見佢都開天幕了,一共六個營,十個人。齊人了:



然後有人話肚餓,煮個面食吓先... 第一晚發現個電油爐又出事,今次唔係個爐,而係個油樽!竟然泵極都唔夠壓力,好在我有後備 gas,但誰不知佢又漏漏地氣,如果要出埋後備爐。


但奇怪既係,係油樽第二朝又無事喎,仲超級正常添,火力一流... 不過咁,因為我罐電油已經用晒,我諗我都未必會再買第二罐電油,用埋最後一樽就收佢檔喇!唔想再煩,日後主力用酒清,最多帶兩三個酒清爐嚟加快速度,需要猛火先間中用吓 gas 爐算數。

我寧願燒柴都唔玩電油喇! (講住先喇) 環保都係用酒精可靠啲...

諗起隊長廿年前咁寫:「另外,就是那個極不忠心的電油爐。這個爐是近這兩年才買的,經過兩年的使用,已經知道它時常會失靈。曾經有一次因為這樣而要改用柴枝起火煮食。慘情....... !!!結果,今次又再來一次。情況需不致於不能點著,但火力卻弱了很多。那晚煮晚餐便因此拖慢了很多。而到了第二朝更完全失靈,最後還是要肢解修理才能再用。但要感恩的是,縱然爐是不忠心,但我們始終是有胞餐食。不致到了四肢無力的地步。

似乎玩電油爐係有一種宿命。

講返呢個行程,陸師兄最早到,佢整咗條繩吊高啲野,幾實用:


記一記隻鑊,話說呢片草地係私人地方,官方野地在小溪對岸,而地主最憎人玩營火,因為怕整爛草地,咁我地就用呢個方法,升起個營火離開地面,但誰不知地主都唔收貨,怕啲人唔知,照燒個地咁就樣衰喇...


所以特登勸大家唔好喇,要玩就過對面官方營地。

許林士多有食物,有豆漿,有豆花之類,絕對要去幫襯吓,佢仲提供厠所同埋水喉,方便大家。

話說,呢度仲有箭豬添,大家記得錫住佢!




(得閒先再寫返,或者等隊長寫)