第一次去咁遠，之前最遠都係上大東山，又或者去田夫仔。今次出發前，估計可能要四個鐘或以上，因此，一切皆以輕量化為主軸。隊長 set 咗 10kg 以下為目標，所以今次唔同玩法，平時大家各自各帶野，無多協調，但今次就分吓工咁。
其他人既 setup 我講唔到細節，我自己就咁玩法：
為咗行山加埋露營既活動，我買咗個輕量化背囊，外國牌子動不動二千樓上，但國內三峰都有出，之前雙 12 見到一個新既型號叫軌跡，佢有一個簡單支撐系統，整體大約 800g，比起我另外嗰啲背囊，足足輕一倍以上！去長咀之前，我突登揹過佢行山 (紅石門)，又試過兩次去露營，試過好用先真係今次用。實驗証明非常成功，呢個袋勁好揹，我估計 12kg 或以下應該都好舒服！
我個袋，走既時候仲可以放埋垃圾：
帳幕我就用三峰既金仔，呢個金仔已經絕咗版，之前用過好多次，今次都擔心佢靠行山杖支撐在大風吓會吹斷 (呢次用碳纖杖，起金仔試過一次，行山三次左右)，！結果佢係無事既，呢個 1kg 樓下既單人帳幕實在不錯！雖然有入風，但我其實真係唔怕凍，所以無咩所謂。聽聞唔入風其實係會有倒汗水添！
今次拉多兩條繩，個型好似好得咁，但經過一晚第二朝就...
今次尤其大問題係個營比較窄，呢點本來都無事，但當晚實在相當大風，風拍落個外帳，外帳就拍內帳，內帳就拍我塊面！搞到瞓得唔係最好！我雖然比平時拉多兩條繩，但亦都解決唔到呢個問題！第二朝明顯睇到個型係 keep 唔到！
因為要極端輕量化，臨時決定加繩但無多餘營釘，咁唯有就地取材，包括一條唔知道邊個掉低既纖維杆，但有一條比較粗實既樹枝：
用足成晚都無事呀！講開就講埋營釘，平時大家都會帶多，但今次就算得太盡，結果都搞得掂既！平時大家都有帶鎚，今次得我一枝，本來好正常無問題，但最勁既刀，都有生銹既一日，戰士死在戰場是好的：
其實佢未爛晒，而事實上我已經買多咗一枝響屋企，我會繼續用到佢用唔到為止，崩咗一角無損性能，仲輕咗幾克添！講開爛野，今次除咗呢個鎚仔，我仲爛咗對手套 (玩過一次浮潛，行過幾次山，上次行紅石門仲差啲跌咗，今次正式爛埋)，同埋一枝自制天幕杆，以下係佢最後一次任務：
志光哥話聽佢半夜斷既聲，我就咩都聽唔到！醒後發現碳纖部份一啲事都無，斷係斷金屬制既接口，成組螺絲口齊口斷晒！
港鐵話扭六個圈 (??) 就安全，我已經全部扭晒入去但都斷 (誤)。言歸正轉，呢種接口又貴，又唔頂得風，以後都唔會再用佢！我返到屋企拆返無爛既兩節出嚟，當係另一枝還健在既 spare parts，頂針同埋個底都仲可以用得返。齊口斷那兩節就難啲重用，因為我係用碳纖布包實既，實到無可能拆出嚟！
天幕係隊長帶，有埋條 LED 燈帶，呢樣我平時都會帶，但今次決定用營燈袋替，燈帶本來都輕，但要加大尿袋唔化算！尿袋我係帶細既，因為知道長咀接收唔到手機信號，電都唔需要多！天幕加燈帶，實在讓野外多一份家既感覺！
橙色那張是隊長的雨褸，後尾開埋嚟擋風！呢個天幕，本來一邊係分別扣住兩個營，另一邊係天幕杆，但後來搵到枝竹，就可以再 set 高少少，實在太正了！
呢個天幕頂到大約兩、三點？因為我五點醒時，已經唔見咗佢，起先仲以為係被風吹走咗，但後尾見啲繩拆返晒出嚟在地上，我就知係唔係吹走！原來隊長見枝碳纖杆斷咗，所以半夜起身拆咗塊天幕！
略略講吓大家啲營，隊長個營係最入風，志光哥個營最企理，我個直頭 "the" 晒... 輕既代價肯定係有，我唔怕凍算係接受得到，日後遠行都會繼續用！
繼續講返我既裝備，今次爐頭用 BRS 最細那個，氣罐用返重用罐，入咗八成滿！其實我一個人 solo 半罐都用唔晒添，但今次確係有啲唔夠，因為路途遙遠要煲返多啲水飲，仲有就係風大，燃料都用多咗，加上今次都幾多野要煮：
隊長就用酒精爐，我就連風擋都唔帶，用埋張枱仔就算！
為咗輕，我無帶油樽，隊長直頭帶漏，但好在我平時有收集即食面麻油既集慣，貪佢地出街唔會漏油，所以都叫做夠油用！另一方面，某啲細節又無諗到，例如各人都有帶牙膏，其實係唔使咯！煲呢方面，帶多都好，因為可以一齊煮，快啲有得食，又唔怕攤凍晒！平時我個調味料袋我突登執過，只帶了鹽和茶包，牙刷都放埋入去，但牙刷套都放低咗！志光哥帶煎 pan，配上牛油紙，都相當實用：
煎蛋都用牛油紙，問你死味！濾水器另一篇講咗，呢度唔重覆！
關於睡袋，我知道自己唔怕凍，所以用咗個薄既，結果都夠暖！我出門口時，連外套都無帶，因為想輕啲！風大就用雨褸，結果發現都實用既！但怕凍既人千祈唔好學我！凍死係無命賠既！地墊都係帶同一張，但無帶電泵喇！眼罩同埋耳塞發現都係有用，長咀雖然無人聲，但海浪聲、風聲都可以幾大！
櫈呢啲舒服野，一定要帶，志光哥仲突登買張新既添！唔係邊有坐得好舒服！
無論前睇、後睇，遠睇、近睇，但係要有櫈仔咯！
Last but not least, 最後必定要提一提佢，我地遇上全世界最好既枱！
希望下次仲會見返佢喇！
