後來又一齊去露營，發覺自己呢類自閉仔實在好喜歡大自然！
當年廿歲出頭，轉眼四十有幾，中間因為細路出世，停了好一段時間無去行山、露營，心中其實仍然好想再次舒展筋骨！我選咗條唔係咁好行既路，亦唔會有咩成就 (有仲驚!)，更深感生命唔係要做到啲咩，而係要好好有所經歷，為自己留下回憶。
爭取到甚麼成就，擁有過甚麼物質，其實都會過去，唯獨經驗過既事情，邊個都改變唔到，就算他日老到失憶，亦已經經歷過，寫在身體髮膚之中！好喇，感性完！
使幾萬蚊去旅行，我當年都試過，俾錢換經驗，人人都得，但穿山越嶺去長咀呢類地方，有錢包船搶灘上岸感覺都唔一樣！所以我就定咗呢個目標！難得有朋友肯陪我顛，正所謂：人生有真正朋友，的確好極！
出發前，甚至回程前既擔憂，擔心體力不足，裝備不夠，全部都係寶貴既經驗！最終有驚無險，全程隊長都帶得好正！我回程睇相，再對照地圖，先稍稍理出頭緒，原來我方向感確實唔掂，事前功課亦做唔足！事後再研究，其實都頗有信心可以再去！而且我一定會再去！
長咀呢個地方，最大優點係遠，而且荒蕪！香港絕大部份地方，都曾經有人往過，有廢村，或者係有山墳，但長咀似乎真係咩都無，除咗小小紀念碑，或是石堆，或是垃圾，或是打風吹過來既廢物！連電話信號都缺，但勝在有水！
離開城市，走向大自然！吃有限的，渴有限的，一條小樹枝都係珍貴資源！晚上和狂風相處，有蟲叫，有浪聲，也有鳥兒的歌聲，這些真能洗掉愁煩。
希望今年可以再來一次，行山好、攝影也好：
當然，露營更好！
係時候要定下一個目標，為只己留下更多經歷！或者都係時候玩吓走營？
沒有留言:
發佈留言