2020 August 刀槍不入山腰再露一露 (露營必須酒)

秘位唔寫真名，出個廢名算數，明就明，唔明就唔好明，免得玩爛！兩次都包場，又唔見有垃圾，真係爽！

今次真係露營必需酒，大家帶既飲品除咗一罐可樂，其餘都係酒！

枝白酒無帶開瓶器，營釘解決：

正所謂人生得意須盡歡，莫使金樽空對月，抬頭一望近乎月圓，七月節就在眼前，荒山野嶺，萬里無人，實在正過鬼！

好，講返個行程！上次人腳唔同，一個鐘先行到；今次行得爽快啲，七個字就到！可能都行得快既關係，所以有啲口渴，飲酒飲得比較速，又空空地肚！話時話，今次啲花生超好味，所以全部清晒！搞到成九點先食飯！

好，都係講返個行程！星期日下午泊車竟然有位，落車快快行，差不多到目的地時，遇上一位怪叔叔，佢跟住我地入咗去秘位先知我地係露營，而佢又唔識路！指點完佢都出唔到去，結果隊長就帶返佢出去！奉勸大家唔識路唔好一個行山，太危險！當時已經近乎入黑，未天黑佢都唔識出返去，天黑咗就慘慘了！

好，又再講返正題！開壇！初初隊長去咗帶怪叔叔出返去，我地起住其他野先，起天幕時佢返嚟喇！呢 360 條片可以睇三次，第一次睇志光哥開蒙古包、第二次睇我開狗屋，第三次睇開天幕！

隊長個營食完飯在天幕底開，因為太早開其實濕晒！空返個天幕然後底下開亦可減少露水！

日落了：

食吓花生啤啤佢，咁大包花生都食晒：

準備煮飯：

突然就煮好了：白飯、粟米六粒、咖哩雜菜、雞扒：

影返張合照先，志光哥半年無浦頭！

飲飽食醉，影吓相：

呢間狗屋唔錯，但其實都係想買返個輕既 free stand 營。因為濕氣重，第二朝要拆走外帳吹乾，然後又要扣返埋，有少少煩，但呢個營係舒服同埋輕既，遲吓先再諗！

今次用水量比較多，濾唔切：

氣氛燈呢啲野，真係正！

其實都幾涼，但我都係長開風扇：

臨瞓搬埋啲枱一邊，今次三張枱放埋一齊，超大！

隊長開營在另一邊：

臨入營前既溫度：

入咗營，發現外帳與內帳之間有螢火蟲！瞓醒第二朝，志光哥話瞓得有史以來最舒服，隊長都話唔錯，我就麻麻，醒咗風扇向上吹想吹返乾啲露水，但最後發覺都係要拆開：

我個營好濕，要拆開外帳嚟曬：

煮早餐：

韓式早餐？

我繼續照常食一丁，呢隻午餐肉幾好味：

臨走作落雨，啲青蜓出晒嚟：

飲埋杯茶，未過濾既溪水沖，特別好味：

唉，露營必須走，約下次喇唯有：

天黑黑，速逃：

呢堆石，一方面係過沼澤既橋，另一方面都係出口既路標之一：

話咁快出返去人類文明：

最後加返張營地既 bullet time:

話說隊長出營直接返工，真係辛苦晒！下次再會。