原本隊長話去馬鞍山昂平，結果我怕熱提議去大嶼山昂坪 (呢排 23-26 度之間)，事就這樣成了；原本想四點集合，結果變咗五點，去到大嶼山就落狗屎：
搭差不多成個鐘巴士，假日仲廿幾蚊，落車時雨過天清：
落車行過去廿分鐘之內吧，隊長預備了大量凍飲，水都無再煲過，一人行一小段，輕輕鬆鬆：
越行越清：
不經不覺就到了：
營地比想像中細，這是較大的一邊，另一邊也有兩、三格！當初諗起公假怕無位，誰不知包場：
天黑前紥好了：
隊長新居入伙：
每格營位不大，大概可放兩個二人營，一家幾口就差不多，若是一大班朋友，這營地並不合適。紥邊位還有草，紥中間就係沙泥地，下雨還會有積水。我地三條友一人一格。搞掂晒坐一陣就煮野食：
日式咖喱汁薯仔帶子，手撕雞、菜、靚仔 (白飯)，仲有酒同汽水：
飯後一齊 hea 吓，吹水、蹗手機、熄燈睇星、食花生、唱吓歌仔、研究歌詞：
呢張天蝎有少少銀河，呢季 (!! 唔應該用呢個詞 !!) 我無帶相機就好天，帶咗就落雨大霧，只有兩次例外！今次無帶落狗屎都變好天！
放空完食埋個宵夜，原來成點先食凍豆花都幾正：
 |
志光哥要用睡袋，我就四點幾熄晒啲風扇。
我起先兩邊營門開晒，但有一邊四點幾大雨時有風吹雨入嚟，最後兩邊都閂晒，因為雨超大亦唔熱。
自那場雨之後，天色轉差，一時下雨，一時大霧，一時放晴！襯機收埋啲野，收淨個天幕最後：
煮早餐，仲有包維奶：
部份凍飲既空罐：
臨走整返張合照：
大嶼山昂坪營地第一露後感：
呢個營地無咩草，地方又細，若果無位都幾煩！另外，落雨明顯有積水，啲泥勁核突，返去有排搞！洗手間頗遠，雖然都好高質！天唔算太黑，但都唔錯了！大型小強比較多，聽聞有鼠患，但我地又唔見喎！黃昏時好多蚊，入黑後就無咩！呢個地方，到過就算，未必會再嚟，交通時間太長！兩程車加埋上上落落，接近兩個鐘，唔化算！
呢個營地無咩草，地方又細，若果無位都幾煩！另外，落雨明顯有積水，啲泥勁核突，返去有排搞！洗手間頗遠，雖然都好高質！天唔算太黑，但都唔錯了！大型小強比較多，聽聞有鼠患，但我地又唔見喎！黃昏時好多蚊，入黑後就無咩！呢個地方，到過就算，未必會再嚟，交通時間太長！兩程車加埋上上落落，接近兩個鐘，唔化算！
去完呢次，呢個全年露既計劃已經完成咗一半，唔知八月去唔去得成呢？
2 則留言:
等我講返幾句...
二十幾年前嚟過昂坪露營，當時仲未有官方營地。我都唔記得喺邊度紥過營，只記得第二朝上過鳳凰山頂(但唔係睇日出)。二十幾年後再嚟，多咗個好靚0既廁所之外，營地設施都算唔錯，尤其有個煮飯位，整得幾好，其他官方營地未見過。可惜真係啲草麻麻地，禿到無朋友，夾硬搵到細細執草位起營，叫做好過紥泥地，否則個營都唔使要。
去咁多次露營，今次算多活動，可以睇星、又可以唱下歌仔，以往都花唔少時間喺煮飯到，呢兩次露營因為怕太熱，盡量搵啲凍食，上次食冷面，今次就食手撕雞，再簡單整咗個咖喱就一餐。結果多咗啲時間做其他嘢，都唔錯!
其實最正就係溫度，山下三十幾，山上得廿幾，飯後坐坐吓有啲凍添！不過初初入營幕訓都有少少熱，開咗把吊扇吹一輪就好舒服喇！加上四點幾落咗場大雨，半夜連風扇都熄埋，一覺訓到天光，雖然唔係訓得太長時間，但係都訓得好舒服！
上次水浪窩黃雨都未能包場，今次竟然可以包場，當然係因為天氣熱喇！落雨都可能係另一個原因，但咁樣我哋唱歌就唔會搔擾到人, 都唱咗成粒鐘, 有Oldfield用ukulele自彈自唱，實在好得無比！
總括而言，今次除咗係好耐未試過o既夏天露營之外，都算係hea得嚟有啲嘢攪作o既一次露營！但如Oldfield話齋，呢個營地都係到此一遊算喇！可能再過廿年後先再嚟！
如果唔係包場，如果唔係飲品充足，唱半個鐘就會收檔
發佈留言