2019 June 6-7 荃錦露營

話收爐又唔收，去多次頹 Camp...

隊長放工車我地上去，好快起好個陣

今次試細 Gas

我整雜菜煲

呢張相重點係艾，驅蚊

呢個冷麵實在頂級

加埋呢個特飲

營外 24 度，有風。。。山竹後荃錦營地見到山下燈光，亦有風，不像過往是密林

我試雙風扇，真實瞓覺時一把轉咗個抽氣扇，將營外鮮風抽入嚟降溫

一抽氣，一吹風

日出後溫度

早餐：

完滿結束，或者七月去一次，八月去多次，就無所謂收季呢個概念了！係咪顛咗少少呢？

ahmou 2018-2019露營小結

破記錄的一季，暫時已露了14次！上季都係露咗8次，這兩年去返過去幾年無去的露營。簡略重溫這14次露營。

2018/09/23-24(日、一)中秋節假期，500米高山上，晚上天氣清涼！
夏天尾開季，市區早上已感覺少許清涼，加上上年開季都係荃錦，相信唔會太熱，結果如所料，吊扇只開了一陣，沒有用內帳，只訓床，夜晚訓得好舒服。
第二朝我們在5 x 3天幕下過了一場黃雨。
(茂、志光、Oldfield、良)

2018/09/30-10/01 (日、一)國慶節假期，長征10公里入香港最東露營 !
其他人都唔得閒，但Marco竟然肯陪我癲。記憶中遠足露營最遠都係去過咸田灣，今次算係壯舉。因為怕曬，所以4:00才起程，到東灣時已天黑，漆黑中找路的確令人容易放棄，但我們的堅持最後仍到達長咀，由北潭凹出發用了五小時才到達長咀！回程時太陽猛烈，差點暈倒，最後在大浪村士多休息了45分鐘才繼續上路，最後在赤徑搭船離開！
(茂、Marco)

2018/10/16-17(二、三)重陽節假期，山上大霧潮濕！
原本想去馬昂，但落雨改去荃錦。
放工揸車接埋大佬、Oldfield、志光上山，到荃錦已晚上九點幾，好大霧，摸黑入營地。阿榮和沙煲兄一早已到，開定爐等我哋食嘢！
第二朝一樣咁大霧，煮完個南乳雞翼面便執嘢走人，走時霧已散！
山上溫度只有20度左右，如果唔係潮濕，溫度很合宜很舒服。
(茂、大佬、榮、沙煲兄、Oldfield、志光)

2018/11/26-27(一、二)戶外學習日翌日學校假期，天很清，睇月出！
學校旅行後急急腳走人，揸車接埋Oldfield、志光直驅鶴藪營地。今次都算早，起好營七點幾，開始打邊爐、飲下酒、吹下水、睇下星！
第二朝仲去咗行山，沿鶴藪水塘繞了一圈，Oldfield為我哋預備咗點心做早餐，食完便開始去行，行完返嚟就執嘢走人。
由於是平日去，除了我們就只有另一壇，整晚都很寧靜，平日露真好！
(茂、Oldfield、志光)

2018/12/25-26(二、三) 聖誕節假期，草地靚，水清沙幼，彷如世外桃園。
路程好長：E23(1小時)→等車45鐘→11A(30分鐘)→步行2小時，12點出發到營地差不多4:30。起好營，set好天幕及各樣嘢已經6:00幾，開始天黑，趁未天黑出海灘走咗轉，然後便開始煮飯！
要行個幾鐘咁遠路途以為唔會多人，結果剛剛相反，去到只剩下這個營區，就好像預留給我們兩仔爺。這塊草地其實唔算差，但其他的確好好多！
這晚食完飯同大佬捉下棋，傾下計，難得的親子樂！
這個營第一次用，講真唔係咁好，太窄，轉身都難。唔係貪佢夠輕都唔會用佢。
今次露營竟然會有人探營，話說志光哥約咗朋友行山，咁啱途經狗嶺涌，所以就咁有緣見一面！
(茂、大佬)

2018/12/28-29(五、六)聖誕節假期，今季最凍的一次露營！
長假期當然要去盡啲，狗嶺涌返嚟休息一日又出動，今次去大灘，第一次嚟，應該無第二次！
阿榮揸車，到北潭涌泊好車再坐94入大灘。要等他放工，所以都係摸黑入，到營地都八點幾。去到營地發覺勁多人露營，眼見估計最少二三十個營，我哋都紥到最入的位置。
當晚只有14度，天氣凍，整咗個海鮮鍋暖下身。食完都成12點，去廁所洗完嘢就訓覺。
第二朝仲凍，得11度，由於仲係假期，所以一早已經有人入嚟攞位起營，我哋的位置亦有人嚟等位，真係誇張過去飲茶！
唔知係唔係前一晚無戴返頂帽所以凍親，返去個頭痛咗成個星期！
(茂、大佬、榮)

2019/02/01-02(五、六)教師發展日早放，少有唔係假期出動！
以為星期五晚無乜人，咁就錯喇！本來預備去涌背，點知涌背、降下岰都爆，最後去鶴藪！鶴藪雖然都係多人，但又未到難民營級數。仲搵到一塊有草的地方紥營，都隔好遠先有營，大家都好安靜。反而阿榮個電油爐最噪！但食完嘢之後爐一熄，寧靜環境又返來了。
上次行紅石門整爛咗支行山仗，於是買過兩支盲公竹款式的行山仗，今次預備用嚟起大金，但原來不能伸縮的盲公竹結果因為過長不能使用，幸好阿榮也有帶一支伸縮款行山仗借給我用才解決問題。
第二朝行下營地，發現十個八個超大營帳，但唔見有人，相信係村長去咗飲茶未返。咁啱漁記巡場，見佢用相機影咗村長個營，便問吓佢會點處理，他說只會掛張紙通知佢無人認領就在唔知幾多日後清理。其實都無咩嘢好做。又問他營地草地如何保養，他說夏天會封場舖過啲草，唔怪得鶴藪即使假期變難民營，啲草地都勉強叫做唔錯。但點解大灘都係村草不生?
(茂、榮)

2019/2/10-11(日、一)農曆新年假期，全家出動嚟次頹CAMP！
一家大細出動，也差不多搬晒屋企最重型的裝備出嚟，其中最重型就係個可以訓4人的狗屋，同事畀，攞咗幾年，因為好多沙，為咗今次可以成家人一齊訓，於是用咗個幾鐘將啲沙沖走，再用兩日吹乾，真係好大工程。
今次都係近年少有咁多人嚟露，數數下有成8人，極之罕見!!! 其中一個原因係太方便，因為係童軍營地，所以設施非常好，有涼沖、有水機、有球場打波、有靚草地紥營。交通又方便，志光直程頹到的來的走，認真夠頹!
話時話今次係第一次喺香港島露營！算係創舉！
當晚打邊爐、燒雞、燒豬肋骨......好正！
(茂、嘉儀、大佬、大小姐、Carman、Oldfield、志光、良)

2019/2/24-25(日、一)家長日補假，又去長咀！
上次去長咀已經係五個月前的事，時間過得咁快！今次天陰陰，又唔使摸黑，又唔使搵路，的確行得舒服好多快好多。3點北潭凹起步，6點幾到長咀，起好營已天黑。當天好大風，吹到好凍，食完個show me your love再食埋個湯丸就訓覺！
當晚真係好大風，連天幕杆都吹斷，我半夜凍醒起身收咗張天幕。但太凍訓得麻麻地! 無帶黑冰睡袋, 失策！
第二朝，四周行了個幾鐘影下相然後煮個早餐，食完便執嘢走人。匆匆來匆匆去，由於路途遙遠，除非三日兩夜，否則很難逗留很久! 但四野無人的環境在香港難得找到, 真係值得再來!
(茂、志光、Oldfield)

2019/4/4-5(四、五)清明假期，竟然無雨紛紛，仲出猛太陽！
話說十幾年無去過赤徑露營，返嚟搵集體回憶，當晚話題都不離赤徑。Oldfield先到，我就放工後接埋大佬驅車入北潭涌，再轉94入北潭凹，行到入去都夜晚7:00。我起好營無耐，阿榮都到，佢放6:00，入到嚟都成8:00。而志光就因為身體不適嚟唔到，可惜!
晚餐整咗個海鮮雜菌煲+炒肥牛＋靚仔，食得滿足！食飽後吹咗一陣水就訓覺！
今次試新營，第一次用隧道營，空間好夠，訓得好舒服，加上天氣清涼，一覺訓到天光，訓得滿足！
第二朝畀太陽曬醒，8:00就起身。阿榮趕時間，8:00就執嘢走。Oldfield就陪我哋食埋早餐，11:00點前都走埋。我哋兩仔爺當然慢慢執嘢，最後搭12:20船走人。
(茂、大佬、榮、Oldfield)

2019/4/18-19(四、五)復活節假期，雨季到喇，落足兩日！
話說3月7日校運會後去水浪窩露營，點知落雨未停過，校運會都摺埋，但我都揸車去到水浪窩停車場，但雨都真係好密，加上又無泊車位，結果都係返咗屋企去唔成。
而今次又係校運會之後，上午天氣都唔錯，今次校運會順利進行，我也順利出發！今次我唔揸車喇，油麻地搭85D入到沙田第一城再轉299X，攞埋水上到營地都5:00，開始落雨喇！
因為天文台預測天氣有雨，加上是星期四，結果如我所想可以包場，實在好得無比！起營期間雨勢愈來愈大，紥好營時雨已落過不停，天又開始黑！我又開始煮飯，本來預埋佢哋，但因為落雨，阿榮、志光都無嚟！唯有Oldfield食完晚飯摸黑入嚟陪我，真夠老友！
當晚又來黃雨，雨落足一晚，其間有一對強國男女到達營地，見佢哋暴雨中起營，好厲害呀！
第二朝雨勢稍為細咗，間中停下又落下，有時又落得好大！需然成晚落雨，但又出奇地好訓喎，一覺又訓到天光，起身又周圍影下相，然後煮個墨丸面做早餐，食時見天色都係麻麻，於是好快執嘢走人！走時有幾壇嚟到搭好營，而其中一壇係三位青年，見佢哋裝備簡陋，天幕都無張。結果整個下午都黃雨，那時我哋已返到屋企，唔知果幾位哥仔點呢？
(茂、Oldfield)

2019/4/23-24(二、三)仲係復活節假期，忽然上大東山，感受天與地的分別！
去長咀講咗無一年都有半載先成行，但今次上大東山講唔知有無3日呢?就成行喇！
山下天色不錯，仲驚會曬死，結果頂帽剩係喺巴士戴過之後都無再戴喇！
主日後返屋企揹埋背囊便出發，Oldfield要遲來，我一人先上山，到伯公岰已經差不多5:00，當時天仍很清，但起步不久就見山上霧氣重重，愈上就愈大霧，到爛頭營時其實都好大霧，但都會時散時密，勉強都仲睇到山下嘅風景，但係就越夜就越大霧。天黑之後根本就係祇有霧，乜都睇唔到。而Oldfield上嚟嘅時候就比我上山時更大霧，大霧到連自己雙腳都睇唔到。
與其話大霧，不如話我哋置身於雲層之中，更加貼切。由於太潮濕，仲濕過落雨，我哋成身都濕曬，頭髮都濕埋，冇一樣嘢係乾嘅。加上風都幾大，又濕，但係我竟然冇帶到營幕(因我以為會好熱)，只帶咗一個蚊沙，同一張天幕，結果我所有嘢都幾乎濕曬。
雖然話係所有嘢都濕曬，但係當我訓覺嘅時候，我嘅體溫竟然可以將睡袋同埋我濕曬嘅衫，都整乾曬，第二朝起身啦，個身係乾嘅。
第二朝起身，都仲係咁大霧！唉，嗱嗱林煮完早餐食完，就執嘢喇，九點幾就執好嘢返落山。雖然山上就好大霧，但係當我哋行到落去伯公岰，竟然係出太陽，望返上山的確係好大霧，但係喺低地，其實係好好天嘅。真係山上山下兩個世界！
總結都係春天唔好上大東山！
(Oldfield、茂)

2019/5/12-13(日、一)佛诞翌日假期，超過20年未試過5月去露營！
見夜晚都仲未駛開冷氣瞓覺，我諗去到郊外，應該都唔會好熱嗻，所以就喺5月我哋都試下去露營啦。加上我又買咗個新營，想試一試，所以決定佛誕假期就去赤徑露營喇。
今次我同大佬就最早入到去，以為會有好多人露營，會好爆！結果就唔係真係好多人，我哋仲可以紮返我哋上次紮營嘅位置。我紮好營，Oldfield 就到喇，到佢都紥好營之後，就接到志光嘅訊息話佢都入緊嚟，佢入到嚟都成九點幾。而今次終於齊人喇！
當晚嘅天氣好涼爽，雖然就密雲，仲落咗幾滴雨，但係氣溫真係好舒服。食完飯我哋仲出咗去碼頭吹下水，又係講下以前喺露營嘅嘢啦！
第二朝仲以為會被曬醒，結果冇太陽，陰陰天，我哋瞓到成六點幾先醒。起身，影咗陣相，見仲咁早，於是又入去訓過，一瞓就瞓到八點幾喇。起身煮早餐食，食完就執嘢走啦，Oldfield同志光先走行返出去北潭凹，我同大佬就搭船走!
(茂、大佬、志光、Oldfield)

2019/6/6-7(四、五)端午節假期，6月露營仲唔熱死你！
開季荃錦，埋季荃錦，一個完美的句號！
但六月去得，七月點解唔可以照去，有無可能呢！暫且當這次是今季最後一露。
其實上次去完赤徑，我已經諗住會六月端午去多一次，但考慮到天氣情況：雨季＋熱！的確令人卻步，所以我都諗住向高山發展，諗過嶂上、馬昂、太墩......大東就因上次打霧關係怕怕！但最後就決定去荃錦，萬一太熱頂唔順，可以即時徹退！
四點半開完會立即去雪櫃執好個冰箱(今次以凍食為主: 凍飲、冷麪、糖水、西瓜)，然後立即驅車上荃錦，到達時差不多五點八，起好營都未天黑！今次我與上次大東山一樣，只用蚊紗＋天幕！明顯比起用營係好好多，無咁焗！
當晚大部份是凍食，開爐只係淥麪同埋煎蝦！少有連水都無煲過，因為我準備了大量凍飲！食完嘢吹水一輪，發覺愈夜愈涼，但個身就黐立立，所以臨瞓前，抹咗身就舒服好多！入到營其實係熱啲。開咗一輪吊扇，唔知幾時熄咗就訓著覺，一訓就天光六點，
第二朝六點醒咗，去完個廁所又繼續訓，最後八點半先起身！因為八點個太陽開始出嚟，之前六點幾時仲好大霧，天陰陰仲可以繼續訓。起身煮完早餐（炒蛋BBQ將吞拿魚番茄三文治)便開始執嘢，呢個時候太陽已開始猛烈，嗱嗱臨執完嘢就走人！下午仲各自去咗飲茶！
(茂、志光、Oldfield)