2019 Aug 7-8 荃錦快閃

八月露營不是夢。

全年露營補完計劃，六月本來諗住收季，結果七月去咗一次，八月再去，去年九月就開季，真正係補完計劃！全年不必停。

山下好熱，山上不錯，廿五度左右，間中有風，坐定定，咪咁大動作就唔會出汗，天氣尚算乾爽，比上次昂坪更好。

食完飯先上，所以起完營大把空間 hea，食吓水果、吹吹水：

今次個陣係咁，紥返老地方，過去十二個月 (唔再用「今季」) 呢個位紥咗好多次：

我就用二人營，但唔上外帳，其實呢個營幾好，不過真係重咗啲！上面紥張天幕，咁整法應該最通爽！隊長介紹呢塊天幕真係又平、又有銀面、又輕！

另外營裡面用大吊扇，希望啲風柔啲、平均啲，另外改裝咗用搖控另外吊起埋塊鋰電。呢個營頂好多位可以掛野上去，之前裝兩把小風扇，再加一盞燈都仲有位！

隊長就用大芭蕉：

佢用返上次昂坪那個營，今次開埋個門通風：

志光哥病咗，得返兩個人，基本上係包場，但第二朝見到露營樂紅人出現，才知佢在我地上方紮：

吹吹水，影吓星，一點鬆啲就刷牙瞓：

An attempt to make stacked star trail but failed badly due to the moving cloud:

快樂時光燃燒過既痕跡，話咁就第二朝：

我自己半夜三點凍醒熄風扇，然後六點幾有被都有啲凍，一張開眼見到咁真好：

行出去影返張正經啲：

日間個陣留影：

無聊影：

坐吓就煮早餐，簡單至上，蜜演煎蛋一叮，凍麥精：

仲有凍豆花：

食完都未出汗，真難得！算係有啲秋意！

執野走就真係熱了，因為要走嚟走去，最後收天幕仲乾曬，無法喇！

但總體而言，至少證明全年露營就無問題！而且還相當舒服！

淋吓兩棵樹，次次都用佢地開天幕，要稍稍報答吓：

大家都用 ultra light 袋，但其實都裝得好重，呢個係隊長既袋：

我出街時磅咗 14.5kg，諗返以前係 12kg 左右，說明袋輕咗，反而仲會裝多啲。

臨走合照：

20190805 快閃夜行飛鵝山

山下風雨飄搖，三條友上山稍稍避靜。

原定目的地，還處最高點的小燈：

探 X 位同埋影相：

下次要帶埋條 timer cable 影 time lapse...

齊齊做影後：

呢張好易以為係月光，其實係手機嚟！

簡簡單單兩、三個鐘，清風送爽。

2019 June 30 - July 1 昂坪露營

實驗全年露既第一擊！七月露營！六月一齊去咗一次荃錦，我自己亦無再去了，諗起都有啲餓呢種感覺！

原本隊長話去馬鞍山昂平，結果我怕熱提議去大嶼山昂坪 (呢排 23-26 度之間)，事就這樣成了；原本想四點集合，結果變咗五點，去到大嶼山就落狗屎：

搭差不多成個鐘巴士，假日仲廿幾蚊，落車時雨過天清：

落車行過去廿分鐘之內吧，隊長預備了大量凍飲，水都無再煲過，一人行一小段，輕輕鬆鬆：

越行越清：

不經不覺就到了：

營地比想像中細，這是較大的一邊，另一邊也有兩、三格！當初諗起公假怕無位，誰不知包場：

天黑前紥好了：

隊長新居入伙：

每格營位不大，大概可放兩個二人營，一家幾口就差不多，若是一大班朋友，這營地並不合適。紥邊位還有草，紥中間就係沙泥地，下雨還會有積水。我地三條友一人一格。搞掂晒坐一陣就煮野食：

日式咖喱汁薯仔帶子，手撕雞、菜、靚仔 (白飯)，仲有酒同汽水：

飯後一齊 hea 吓，吹水、蹗手機、熄燈睇星、食花生、唱吓歌仔、研究歌詞：

呢張天蝎有少少銀河，呢季 (!! 唔應該用呢個詞 !!) 我無帶相機就好天，帶咗就落雨大霧，只有兩次例外！今次無帶落狗屎都變好天！

放空完食埋個宵夜，原來成點先食凍豆花都幾正：

再一齊出去廁所抹身、洗碗，之後就返去瞓。廁所外勁好風，但營地就無咩風，可能山邊加有樹圍住。我照舊開兩把風扇，其中一把轉個去內帳邊抽風入嚟，隊長就一把吊扇：

志光哥要用睡袋，我就四點幾熄晒啲風扇。

我起先兩邊營門開晒，但有一邊四點幾大雨時有風吹雨入嚟，最後兩邊都閂晒，因為雨超大亦唔熱。

自那場雨之後，天色轉差，一時下雨，一時大霧，一時放晴！襯機收埋啲野，收淨個天幕最後：

煮早餐，仲有包維奶：

部份凍飲既空罐：

臨走整返張合照：

大嶼山昂坪營地第一露後感：

呢個營地無咩草，地方又細，若果無位都幾煩！另外，落雨明顯有積水，啲泥勁核突，返去有排搞！洗手間頗遠，雖然都好高質！天唔算太黑，但都唔錯了！大型小強比較多，聽聞有鼠患，但我地又唔見喎！黃昏時好多蚊，入黑後就無咩！呢個地方，到過就算，未必會再嚟，交通時間太長！兩程車加埋上上落落，接近兩個鐘，唔化算！

去完呢次，呢個全年露既計劃已經完成咗一半，唔知八月去唔去得成呢？